- Диданд: 656
Меҳргон яке аз ҷашнҳои бузурги мардуми ориёитабор буда, бо шарофати истиқлолият ва ибтикори Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз нав эҳё гардид.
Иди Меҳргон яке аз ҷашнҳои қадимтарини мардумии мо маҳсуб ёфта, ҳамчун иди меҳру муҳҳабат, дӯстию рафоқати одамон ба якдигар, накӯкорӣ, тантанаи ранҷи кашидаи барзгарон аст, ки ниёгони мо баъди ҷамъоварии ҳосил таҷлил мекардаанд. Бо шарофати соҳибистиќлолии мамлакати азизамон ва сиёсати хирадмандонаи Асосгузори сулҳу ваҳдати миллӣ-Пешвои миллат, Президенти кишвар муҳтарам Эмомалӣ Раҳмон иду ҷашнвораҳои миллии тоҷикон аз нав эҳё гаштаву дар байни мардум ҷашн гирифта мешаванд.
Вожаи "меҳр" дар асотири Эрони бостон дар шакли Митра аст, ки эзади фурӯғу рӯшноӣ ва паймоншиносӣ мебошад. Номи ин ҷашн дар сарчашмаҳои бостонӣ низ ба гунаи Митракона зикр шудааст. Ҷашни Меҳргон аз замонҳои хеле қадим, аз давроне ки қавмҳои ориёӣ ойин меҳрпарастӣ доштанд, боқӣ мондааст.
Ҳар сол сокинони ноҳияи Сангвор ҷашни бузурги ниёгон - Меҳргонро дар якҷоягӣ бо кишоварзону занони кадбонуву ҳунарманди ноҳия дар сатҳи баланди ватандорӣ, эҳтиром ба расму таомули аҷдодӣ, эҳёи ҳунарҳои мардумӣ, оростани дастархони пурганҷ, бо шукргузорӣ аз даврони соҳибистиқлолӣ самимона истиқбол менамоянд.
Бахусус, дар маркази ноҳияи Сангвор ин ҷашни аҷдодӣ ҳар сол самимона таҷлил мегардад. Дар солҳои 2019 - 2021 Солҳои рушди деҳот, сайёҳӣ ва ҳунарҳои мардумӣ ин ҷашни босахо, пурфайзу бобаракат самимона таҷлил мегардад.
Истиқлолияти давлатии Тоҷикистон барои эҳёи расму оинҳои миллӣ, аз ҷумла Меҳргон, заминаи воқеӣ ба вуҷуд овард. Бо Қарори Ҳукумати Ҷумҳурии Тоҷикистон аз 5 августи соли 2009 Иди Меҳргон дар ҷумҳурӣ ҳамчун иди миллӣ эътироф гашта, дар баробари ин Ҳукумати Ҷумҳурии Тоҷикистон пайваста талош меварзад, то мероси ғании фарҳангӣ, расму оинҳои ниёгон дар доираи чорабиниҳои давлатӣ таҷлил гарданд.
Маҳз таваҷҷуҳи хосаи Асосгузори сулҳу ваҳдати миллӣ – Пешвои миллат, Президенти мамлакат муҳтарам Эмомалӣ Раҳмон ба гиромидошт ва эҳёи ҷашнҳои миллӣ буд, ки дар замони соҳибистиқлолии мамлакат Меҳргон аз нав бо тамоми шаҳоматаш эҳё ва ба қатори беҳтарин ҷашнҳои миллӣ ворид гардид ва ҳар сол ботантана ҷашн гирифта мешавад.
Алҳол аҳли шаҳру деҳоти Тоҷикистон ба ифтихори Меҳргон ҷашнҳои бузург меороянд ва дастурхонҳояшонро бо анвои меваҳо, сабзаҷот ва хӯришҳои дигар ороста, дар атрофи хони пурнозу неъмат таронасароӣ мекунанд.
Соли равон барои кишоварзони мамлакат пурфайз омад. Тибқи хулосаи мутахассисон, ҳосили имсола зироатҳои кишоварзӣ назар ба порсола хеле беҳтар аст.
Роҷеъ ба пайдоиши ҷашни Меҳргон дар сарчашмаҳои таърихию адабӣ қиссаву ривоятҳои гуногун зикр шудаанд. Фирдавсӣ дар «Шоҳнома» роҷеъ ба ҷашну ойинҳои эрониёти бостон маълумотҳои ҷолиб оварда, бо меҳру муҳаббат ба таъриху суннатҳои ниёкони худ аз онҳо ёд мекунад. Ӯ рӯзи аввали ба тахт нишастани Фаридунро баробар бо рӯзи Меҳргон медонад ва шурӯъи таҷлили ин ҷашнро низ ба ӯ нисбат медиҳад.
Замона беандӯҳ гашт аз бадӣ,
Гирифтанд ҳар як роҳи эзадӣ.
Дил аз довариҳо бипардохтанд,
Ба ойини кай ҷашни нав сохтанд.
Нишастанд фарзонагон шодком,
Гирифтанд ҳар як зи ёқут ҷом,
Майи равшану чеҳраи шоҳи нав,
Ҷаҳон гашт равшан сари моҳи нав.
Бифармуд, то оташ афрӯхтанд,
Ҳама анбару заъфарон сӯхтанд.
Парастидани Меҳргон дини ӯст,
Таносониву хӯрдан ойини ӯст.
Кунун ёдгор аст аз ӯ моҳи меҳр,
Бикӯшу ба ранҷ эч манмой чеҳр!
Ҷашни Меҳргонро бо нияте баргузор менамоянд, ки ҳамасола ҳосили деҳқониашон фаровон гардад. Имрӯз Меҳргон ҷашни кишоварзон, ҷашни ҳосилу фаровонии неъмати деҳқонӣ, баракати рӯзгор ва хушии мардуми фарҳангсиришту заҳматпешаи Тоҷикистон аст.
- Диданд: 870
15 октябри соли 2021
Ҳамватанони азиз!
Ҳамаи шуморо ба муносибати ҷашни бостонии Меҳргон, ки мероси гаронбаҳои маънавии ниёгонамон мебошад, самимона табрик мегӯям.
Ҷашни Меҳргон дар таърихи тамаддуни мардумони ориёитабор аз ҷумлаи ойинҳои бисёр арзишманде мебошад, ки ба туфайли заминаву фазилатҳои муҳимми табиӣ, иҷтимоӣ ва маънавии худ то ба рӯзҳои мо расидааст.
Меҳргон ҷашни тирамоҳии сол ба шумор рафта, гузаштагони мо онро ҳамчун рамзи шукргузорӣ аз неъматҳои табиат ва заҳмати кишоварзон баргузор мекарданд ва ба ин васила ба пайванди инсон ва табиат арҷ мегузоштанд.
Ба ин маънӣ, Меҳргон баробари инкишофи зироаткорӣ ва ҷорӣ гардидани тақвими деҳқонӣ пайдо шуда, бинобар ин, ҷашни ҳосилот ва кишоварзон ба шумор меравад.
Яъне ниёгони мо дар айёми баҳор бо нияти нек ва умеди ҳосили фаровон ба корҳои кишоварзию боғдорӣ оғоз карда, дар фасли тирамоҳ маҳсули заҳмати худро ҷамъоварӣ мекарданд, баъди ҷамъоварии ҳосил ҷашн меоростанд ва бо шодиву хурсандӣ якдигарро муборакбод менамуданд.
Қобили зикр аст, ки имрӯзҳо ба истиқболи ҷашни Меҳргон кишоварзони мо, аз ҷумла пахтакорон, боғу токпарварон ва чорводорон бо ғайрати дучанд заҳмат кашида, дар таъмини амнияти озуқаворӣ ва пешрафти иқтисодиёти мамлакат саҳми бисёр арзишманд гузошта истодаанд.
Натиҷаи ҳамин заҳмати софдилонаи онҳост, ки ҳаҷми истеҳсоли маҳсулоти кишоварзӣ сол ба сол зиёд шуда, садҳо ҳазор тонна меваю сабзавот ва меваи хушки аз лиҳози экологӣ тозаи Тоҷикистон ба кишварҳои хориҷӣ содирот шуда истодааст.
Зимнан бояд гуфт, ки Меҳргон на танҳо ҷашни фаровонии дастранҷи кишоварзону боғдорон ва файзу баракати хонадони мардум аст, балки рамзи унсурҳои неки маънавию фарҳангӣ низ ба шумор меравад.
Тибқи маълумоти манбаъҳои таърихиву адабӣ бунёдгузории ин ҷашн ба шоҳи пешдодӣ – Фаридун нисбат дода мешавад.
Моҳияти асотирии Меҳргонро низ ғояҳои ахлоқии ҷашнҳои Наврӯзу Сада, яъне пирӯзии адолат бар ҷаҳолат, нур бар зулмот, ободгарӣ бар харобкорӣ ва некӣ бар бадӣ ташкил медиҳанд.
Ҷашни Меҳргон, алалхусус, бо шеъру мусиқии миллии тоҷикӣ робитаи зич дорад.
Меҳргон дар ашъори шоирони классики форсу тоҷик, махсусан, устод Рӯдакӣ, Фирдавсӣ, Унсурӣ, Фаррухӣ, Манучеҳрӣ, Масъуди Саъди Салмон, Сайидои Насафӣ, Носири Хусрав ва дигарон ҳамчун рамзи баракату фаровонӣ, файзи дастархони мардум ва ҳунармандону чорводорон васф шуда, бузургии он ҳамчун айёми меҳрубониву меҳрварзии инсонҳо таъкид гардидааст:
Меҳрубонӣ кун ба ҷашни
Меҳргону рӯзи меҳр,
Меҳрубонӣ кун ба рӯзи
Меҳру ҷашни Меҳргон.
Минбаъд тайи асрҳои зиёд инъикоси ин ҷашн дар эҷодиёти шоирон камрангтар шуда, бо эҳёи ин ойини мардумӣ дар даврони истиқлоли давлатӣ аз нав оғоз гардид.
Соли ҳафтум аст, ки мо ҷашни Меҳргонро дар фазои соҳибистиқлолии мамлакат таҷлил намуда, онро ба қатори ҷашнҳои расмӣ ба қонунгузории кишвар ворид кардаем.
Дар сатҳи давлатӣ таҷлил намудани Меҳргон пайванди моро бо решаҳои бостонии миллиамон тақвият бахшид ва боиси болоравии худшиносиву худогоҳии мардуми мо, аз ҷумла наврасону ҷавонон гардид, зеро Меҳргон рамзи ваҳдати инсонҳо, намунае аз ахлоқи баландтарини инсонӣ, меҳрварзиву накӯкорӣ, ватандӯстӣ ва адолатпарварӣ ба шумор меравад.
Бо густариш додани чунин ойину ҷашнҳои миллати бостониамон, аз ҷумла Наврӯзу Тиргон, Меҳргону Сада ва дигар суннатҳои неки мардумамон мо бояд минбаъд низ тамоми саъю талоши худро ба хотири рушди давлат, ободии Ватан, дар арсаи байналмилалӣ боз ҳам баланд бардоштани обрӯи миллат ва барои аз имрӯза беҳтар гардонидани шароити зиндагии халқамон равона созем.
Бори дигар мардуми шарифи Тоҷикистонро ба ифтихори ҷашни пурфайзи Меҳргон самимона табрик гуфта, ба ҳар як хонадони кишвар дастархони пурнозу неъмати меҳргонӣ, рӯзгори осуда ва бахту саодат орзу менамоям.
Ҷашни Меҳргон муборак бошад, ҳамватанони азиз!
- Диданд: 656
20-сентябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар идомаи сафари корӣ дар ноҳияи Сангвор ба бунёди Муассисаи томактабии замонавии «Калидчаи Заррин» оғози расмӣ бахшиданд.
Кӯдакистони замонавӣ дар маркази ноҳияи Сангвор барои 100 нафар дӯстрӯяк дар асоси ҳидоятҳои ҳамешагии Сарвари маорифпарвари мамлакат муҳтарам Эмомалӣ Раҳмон бо иқдоми Ҷамъияти дорои масъулияти маҳдуди «Зарринк» бунёд карда мешавад.
Фармоишгари муассисаи нави томактабӣ Мақомоти иҷроияи ҳокимияти давлатии ноҳияи Сангвор буда, лоиҳаи иншооти зебо аз ҷониби Ҷамъияти саҳҳомии кушодаи «Меъморӣ ва шаҳрсозӣ»-и шаҳри Душанбе таҳия гардидааст.
Президенти мамлакат муҳтарам Эмомалӣ Раҳмон пас аз шиносоии пурра бо лоиҳаи бунёди Муассисаи томактабии «Калидчаи Заррин» дар ҳамин ҷо бо имконоти фаъолияти Ҷамъияти дорои масъулияти маҳдуди «Зарринк» дар ноҳияи Сангвор шинос гардиданд.
Ҷамъияти дорои масъулияти маҳдуди «Зарринк» аз корхонаҳои пешқадами саноатӣ дар мамлакат буда, дар рушди иқтисоди миллӣ ва саноатикунонии босуръати кишвар саҳми намоён дорад.
Корхона дар асоси ҳидоятҳои бевоситаи роҳбарияти олии давлат ва Ҳукумати мамлакат фаъолияташро сол аз сол тавсеа бахшида, бо ворид ва васлу насби хатҳои нави технологӣ ба дастовардҳои назаррас ноил мегардад.
Иттилоъ дода шуд, ки давоми чанд соли охир дар асоси ҳамкорӣ бо шарикони рушд ҷиҳати истифодаи пурраи имконоту иқтидорҳои мавҷуда аз кишварҳои пешрафтаи ҷаҳон ба корхона технологияҳои насли нав ворид карда шудааст.
Дар корхона наздики 400 нафар бо ҷойи кори доимию мавсимӣ таъмин мебошад.
Сарвари давлат муҳтарам Эмомалӣ Раҳмон ба роҳбарияти корхона барои дастгирӣ аз иқдомҳои созандаи давлат ва Ҳукумати мамлакат дар самти таъсиси ҷойҳои нави корӣ, коркарди ашёи хоми ватанӣ изҳори сипосу миннатдорӣ намуда, ба масъулон ҷиҳати дастгирӣ аз ташаббусҳои неку бобарор дар рушди иқтисоди миллӣ, дастуру супоришҳои мушаххас доданд.
- Диданд: 805
Дастуру супоришҳои Президенти Ҷумҳурии Тоҷикистон, ки дар паёми Президенти Ҷумҳурии Тоҷикистон 26 январи соли 2021 «Дар бораи самтҳои асосии сиёсати дохилӣ ва хориҷии ҷумҳурӣ» ироа гардидаанд, масъулини мақомоти иҷроияи ҳокимияти давлатии ноҳияи Сангвор, роҳбарони ташкилоту муассисаҳо, вакилон, фаъолон ва аҳолии ноҳия мавриди татбиқ қарор дода истодаанд.Ҷиҳати иҷрои бандҳои паём Нақшаи чорабиниҳои ноҳиявӣ таҳия гашта бо қарори раиси ноҳия аз 19 феврали соли 2021 бо №57 тасдиқ карда шуда, мунтазам дар ин самт кор бурда мешавад.
Ноҳияи Сангвор дорои шароити мусоиди рушди соҳаи сайёҳӣ ба шумор меравад. Иқлим, табиат, ҳайвонот ва наботот, ҳавои тозаи кӯҳсор, чашмаҳои шаффоф, ки дар ноҳия мавҷуд мебошанд, барои ташкили осоишгоҳҳои табобатӣ, экотуризми сатҳи ҷумҳуриявӣ ва байналмилалӣ мувофиқ мебошад. Лозим меояд, ки фаъолнокии соҳибкорон оид ба ташкили муассисаҳои номбурда, агентиҳо оид ба ташкил ва истеҳсоли маҳсулот ва хизматрасонии туристӣ вусъат дода шавад. Ояндаи ноҳияи Сангвор ва рушди он ба туризм вобастагии зич дорад.
Дар шаш моҳи соли 2021 ба оилаҳои ниёзманд, ятимон, маъюбон, хонандагони мактаб-интернати ҷумҳуриявӣ, ба афсарону аскарони қисми низомии дар ҳудуди ноҳия буда, оилаҳои шахсони дар барқароркунии сохти констутитсионї ҳалокшуда, иштирокчиёни ҶБВ, модарони собиқадор, оилаҳое, ки фарзандонашон ба сафи Қувваҳои мусаллаҳ сафарбар карда шуданд, ба маблағи беш аз 300 ҳазор сомонӣ аз тарафи мақомоти иҷроияи ҳокимияти давлатии ноҳия ва соњибкорон маводҳои ѓизої ва кумакҳои молиявӣ расонида шудаааст. Ғайр аз ин дар ҷашни “Рӯзи Модар” беш аз 100 нафар занону бонувони коргар, занони фаъол, модарони наваскарон бо туҳфаҳо сарфароз гардонида шуданд. Дар арафаи иди Наврӯз ба ду нафар иштирокчиёни Ҷанги Бузурги Ватанӣ ва ниёзмандон аз тарафи мақомоти иҷроияи ҳокимияти давлатии ноҳия маводи ғизоӣ кумак расонида шуд. Дар доираи имконоти мавҷуда тадбирҳои амалӣ андешида, корҳои созандагиву ободонӣ, бунёдкорӣ, таъмиру тармими роҳҳо, пулҳо, иншоотҳо, муассисаҳои маорифу тандурустӣ, иҷтимоию фарҳангӣ ва иҷрои ҳамаҷонибаи нақшаи чорабиниҳо дар ноҳия роҳандозӣ гардида истодааст. Дар байни аҳолии ноҳия мунтазам корҳои тарғиботию ташвиқотӣ ҷиҳати инъикоси нақшу арзишҳои Ваҳдати миллӣ, Истиқлолияти давлатӣ, ифтихори ватандорӣ, таҳкими сулҳу субот, мустаҳкам намудани пояҳои давлатдорӣ, ватандӯстӣ, ифтихори миллӣ, созандагию ободкорӣ ба сомон расонида шуда истодааст.
Дар моҳномаи ноҳиявии «Мавҷи Хингоб» доир ба арзишҳои Истиқлолияти давлатӣ, ифтихор аз Ваҳдати миллӣ, сулҳу субот ва ҳисси ватандорӣ мунтазам маводҳо ба табъ мерасанд. Доир ба татбиқи дастуру ҳидоятҳои Сарвари давлат оид ба андешидани чораҳои пешгирикунандаи паҳншавии бемориҳои сироятӣ, истифодаи сарфакоронаи неруи барқ, истифодаи оқилонаи заминҳои наздиҳавлигӣ, тозаю озода намудани хонаю ҳавлии сокинон бо ҷалби фаъолону масъулин корҳои фаҳмондадиҳиро бо сокинони ноҳия пурзўр карда мешаванд.
Сокинони ноҳияи Сангвор фаъолияти худро баҳри таъмини иҷрои қонунҳои амалкунандаи Ҷумҳурии Тоҷикистон, фармону амрҳои Президенти кишвар, қарору супоришҳои Ҳукумати Ҷумҳурии Тоҷикистон ва барномаҳои қабулнамудаи соҳавию минтакавӣ равона менамоянд.
Иҷрои андозҳо ва буҷети ноҳия
Қисми даромади буҷети ноҳия дар шаш моҳи соли 2021 ба ҷои 3 миллиону 95 ҳазору 160 сомонии дар нақша пешбинишуда 7 миллиону 526 ҳазору 622 сомонӣ иҷро гардидааст, ки он ба 243 дарсади нақша баробар мебошад.
Нақшаи андозҳо бо назардошти андози иҷтимоӣ дар давраи ҳисоботӣ ба маблағи 3 миллиону 95 ҳазору 160 сомонӣ, ки иҷрои он ба 7 миллиону 420 њазору 41 сомонӣ, ё ин ки 240 дарсад иҷро шудааст. Маблағҳои ворид кардашуда нисбат ба ҳамин давраи соли 2020 4 миллиону 2 ҳазору 395 сомонӣ зиёд мебошанд.
Қисми хароҷоти буҷет дар шаш моҳи соли 2021 ба ҷои 13 миллиону 495 ҳазору 399 сомонии дар нақша пешбинишуда 11 миллиону 836 ҳазору 488 сомонӣ иҷро гардидааст, ки он ба 87,7 дарсади қисми хароҷот баробар аст.
Бақияпулиҳои андоз ба ҳолати 1 июни соли 2020 621 ҳазору 959 сомониро ташкил медиҳанд, ки нисбат ба аввали соли ҷорӣ 161 ҳазору 803 сомонї бақияпулӣ кам гардидааст. Нозироти андози ноҳия дар шаш моҳи соли 2021 аз нақшаи умумии андозҳо нақшаи Андоз аз соњибони воситаҳои нақлиётро иҷро карда натавонистааст, ки ба андозаи 82 % баробар гардидааст.
Соҳибкорӣ ва сармоягузорӣ
Дар шаш моҳи соли 2021 тариқи “Равзанаи ягона” дар ҳудуди ноҳия 122 субъекти соҳибкории инфиродӣ фаъолияткунанда ба қайд гирифта шудааст, ки ин нишондиҳанда нисбат ба ҳамин давраи соли 2019, 16 адад зиёд гардидааст.
Аз ҳисоби 33 соҳибкорони инфиродӣ, ки бо шаҳодатнома фаъолият доранд, ба буҷети ноҳия 80,1 ҳазор сомонӣ ворид гардид, ки 110 дарсади нақшаро ташкил медиҳад.
Соҳибкорони инфиродие, ки тариқи патент фаъолият доранд 68 нафар буда, дар ин муддат 45,0 ҳазор сомонӣ ба буҷет ворид намудаанд.
Аз тарафи шахсони ҳуқуқӣ бошад дар шаш моҳи соли ҷорӣ 11 521 ҳазор сомонӣ андози даромад аз шахсони воқеї, 107 692 ҳазор сомонӣ андози соддакардашуда ва 50 699 ҳазор сомонӣ андози иҷтимоии ғайрибуҷетӣ ба буҷет ворид гардид. Ҷамъ аз ҳама намуди андозҳое, ки аз ҷониби соҳибкорон пардохт гардидаанд, 295 037 ҳазор сомониро ташкил медиҳанд.
Бонк
Филиали №21 БДА ҶТ “Амонатбонк” дар ноҳия ба 107 корхонаҳои буҷетӣ ва ғайрибуҷетӣ тавассути кортҳои бонкӣ хизматрасонӣ мекунад, ки шумораи истифодабарандагони кортҳои пластикӣ ба 5 ҳазору 54 нафар расидааст. Интиқоли маблағ аз хориҷи кишвар дар шашмохаи якуми соли 2021 тариқи бонки мазкур 996,5 ҳазор доллари ИМА ё баробар ба 11 миллиону 280 хазору 866 сомони ворид гардидааст, ки нисбат ба ҳамин давраи соли 2020, 145,1 ҳазор доллар зиёд мебошад. Дар давраи ҳисоботї ба аҳолї 2 миллиону 107 ҳазору 499 сомонї қарзҳои кўтоҳмуддат дода шудааст, ки он дар муқоиса ба ҳамин давраи соли 2020 653 ҳазору 343 сомонӣ бештар аст.
Маҷмӯи маҳсулоти дохилӣ
Маҷмӯи маҳсулоти дохилии ноҳия дар шаш моҳи соли 2021 ба 67,2 миллион сомонӣ баробар гардида, нисбат ба њамин давраи соли гузашта 20,8 миллион сомонї зиёд мебошад, ки суръати афзоиши воқеии солонаи он ба ҳисоби миёна 31 фоизро ташкил намудааст. Ин нишондиҳандаҳо ба соҳаи кишоварзӣ 7,6 миллион сомонӣ, ба соҳаи савдо 20,2 миллион сомонӣ, ба соҳаи хизматрасонии пулакӣ 4,2 миллион сомонӣ ва ба соҳаи саноат 35,2 миллион сомонӣ рост омада, ба ҳар сари аҳолии ноҳия 2 760 сомонӣ баробар гардидааст.
Дар ин давра истеҳсоли маҳсулоти кишоварзӣ 8,4%, маҳсулоти саноатӣ 57,6%, ҳаҷми гардиши савдои чакана 24,2% ва хизматрасони пулакӣ ба аҳолӣ 14,2% дар қиёс ба нимсолаи соли 2020 афзоиш ёфтаанд.
Аҳолии ноҳия ба ҳолати 1 июни соли 2020 24,3 ҳазор нафарро ташкил медиҳад, ки маҷмӯи маҳсулоти дохилӣ дар ноҳия ба ҳар сари аҳолӣ:
- дар соҳаи кишоварзӣ 312 сомонӣ;
- дар соњаи саноат 1446 сомонї;
- соҳаи савдо 830 сомонӣ
- хизматрасонии пулакӣ 172 сомонӣ рост меояд.
Соҳаи кишоварзӣ
Кишоварзӣ дар ноҳия соҳаи асосӣ ва афзалиятнок ба ҳисоб рафта, зиёда аз 70 фоизи аҳолии қобили меҳнат дар соҳаи кишоварзӣ фаъолият мекунанд.
Кишоварзон имсол тибқи нақшаи дурнамо дар майдони 1540 га ғалладона, 1117 га картошка, 214 га сабзавот, 50,5 га зағир, 4 га полезӣ, 52 га хўроки чорво гузаронида, 19 га боғи нав бунёд намуданд.
Кишти зироатҳо соли равон дар муқоиса ба соли 2020 ғалладона 2 га, сабзавот 3 га ва зағир 2,5 га, хўроки чорво 39 га зиёд кишт карда шудааст.
Маҷмӯи маҳсулоти кишоварзии ноҳия дар нимсолаи аввали соли 2021 ба 7,6 миллион сомонӣ баробар гардид, ки ин нишондиҳанда нисбат ба ҳамин давраи соли 2020, 598 њазору 600 сомонӣ зиёд мебошад.
Дар давраи ҳисоботӣ дар ноҳия 318 тонна гӯшт, 680 тонна шир ва 427 ҳазор дона тухм истеҳсол гардида, дар муқоиса ба ҳамин давраи соли 2020 мутаносибан 24 тонна гўшт, 55 тонна шир зиёд мебошад.
Идораи давлатии беҳдошти замин ва обёрӣ
Дар тавозуни идораи давлатии беҳдошти замин ва обёрии ноҳия 11 шабакаи обёрӣ мавҷуд буда, онҳо ба дарозии 46,2 км ба аҳолӣ хизмат мерасонанд. Дар нимсолаи якуми соли 2021 идораи давлатии беҳдошти замин ва обёрии ноҳия барои бо оби полезӣ таъмин намудани 850 га замин шартнома ба имзо расонидааст, ки он 100 фоизи нақшаро дар бар гирифта, ин нишондиҳанда дар қиёс ба соли 2020 100 га зиёд мебошад. Дар шаш моҳи сипаригашта барои истифодаи оби полезӣ аз ҳисоби истифодабарандагон 19390 сомонӣ пешпардохт гардидааст, ки нисбат ба њамин давраи соли гузашта 2 790 сомонї зиёд мебошад.
Маркази таъминоти бехатарии озуқаворӣ
Маркази таъминоти бехатарии озуқавории ноҳия дар шашмоҳаи соли 2021 баҳри амалӣ намудани Қонуни Ҷумҳурии Тоҷикистон “Дар бораи байторӣ” як қатор чорабиниҳои зиддиэпизоотикӣ, табобатӣ, нозирӣ ва хизматрасонии байториро гузаронидааст.
Дар ҳудуди ноҳия 31,0 ҳазор сар чорвои калони шохдор, 72,3 ҳазор сар чорвои хурд, 626 сар асп, 45,1 ҳазор сар паранда ва 14,4 ҳазор оилаи занбўри асал парвариш меёбанд.
Дар шаш моҳи соли 2021 барои вайрон намудани қоидаҳои байторӣ-беҳдоштӣ аз тарафи кормандони маркази таъминоти бехатарии озуќавории ноҳия ба шахсони инфиродӣ 7 адад ҷарима ба маблаѓи 960 сомонӣ ба қайд гирифта шудааст. Кормандони ин соҳа аз ҳисоби хизматрасонии пулакии байторӣ ва карантини растанї дар давраи ҳисоботӣ ба суратҳисоби махсуси Кумитаи бехатарии озуқавории назди Ҳукумати Љумҳурии Тољикистон 11 ҳазору 500 сомонӣ ворид намуданд.
Дар шаш моҳи соли љорї аз тарафи кормандони муассисаи мазкур як қатор чорабиниҳои пешгирии зидди касалиҳои сироятии чорво, аз ҷумла касалии сўхтанӣ: чорвои калони шохдор-2138 сар, чорвои хурд-1894 сар, вабои сумдард: чорвои калони шохдор-2672 сар, чорвои хурд-2612 сар ва дигар намуди касалиҳои сироятӣ эмгузаронӣ карда шудааст.
Ҷиҳати татбиқи Қонуни Ҷумҳурии Тоҷикистон “Дар бораи бехатарии маҳсулоти хўрокворӣ” 16 нафар соҳибкорони инфиродиро мувофиқи муроҷиаташон аз аттестатсияи байторӣ-санитарии шароити истеҳсолӣ гузаронида, аз ин ҳисоб ба маблағи 2880 сомонӣ ба буҷети ҷумҳурӣ ворид намудааст.
Заминсозӣ
Кумитаи идораи замини ноҳия бо мақсади пурраю оқилона ва самаранок истифода бурдани замин, афзун намудани истеҳсоли маҳсулоти кишоварзӣ нақшаи чорабиниҳо тартиб дода, дар асоси он фаъолияташро ба роҳ мондааст.
Ноҳияи Сангвор дорои 597 384 ҳазор гектар замин мебошад, ки аз ин: 2278 га корам, (1753га обӣ, 525 га лалмӣ) 424 га боғ, 96 га алафзор, 42 га заминҳои хоҷагиҳои ёрирасон, 170824 га чарогоҳ, 1 ҳазору 522 га заминҳои наздиҳавлигӣ, 19738 га ҷангалу бешазор, 4 га ботлоқҳо ва буттазор, 6702 га заминҳои зери об, 419 га роҳҳои чорвогузар, 187 га зери иморатҳо ва 395148 га дигар заминҳоро ташкил медиҳанд. Вобаста ба қонун вайронкуниҳои соҳаи замин аз ҷониби прокуротураи ноҳия дар давраи шаш моҳи соли равон 1 пешниҳоди прокуротура ба мақомоти иҷроияи ҳокимияи давлатии ноҳия ворид шудааст.
Дар шаш моҳи соли 2021 аз тарафи кумитаи идораи замини ноҳия 18 ҳолати вайронкунии қонунгузории замин ошкор карда шуда, баҳри бартараф намудани қонунвайронкуниҳо 10 дастур ба шањрвандон дода шудааст, ба 3 нафар барои надоштани шаҳодатнома дар бораи бақайдгирии давлатии замин, ба 2 нафар шаҳрвандон барои напардохтани андози замин ба 1 нафар барои шурӯъ накардан барои сохтмон дар давоми се сол ва 1 нафар барои худсарона ғасб намудани қитъаҳои замин, 1 нафар барои иљро накардани дастур қарори ҷаримабандӣ татбиқ гардидааст, ки маблағи умумии ҷарима 2 760 сомониро ташкил дода, 1860 сомонии он ба суратҳисоби махсуси идораи замин ворид карда шудааст.
Корхонаи воҳиди давлатии «Бақайдгирии молу мулки ғайриманқул» дар шаш моҳаи соли 2021, 122 адад парвандаи заминсозӣ барои гирифтани шаҳодатнома дар бораи бақайдгирии давлати тайёр кардааст. Ин муассиса 118 адад, шањодатномаи наздиҳавлигӣ, 8 адад ташкили хоҷагии деҳқонӣ, 4 адад ивази шаҳодатнома, 11 адад соҳибҳуқуқи, 2 адад дигар сохтмонњо, 11 шиносномаи техникии ҳавлидорӣ ва 4 адад иқтибос ба шаҳрвандон дастрас намудааст.
Саҳифаи 23 аз 26
 |
 |
 |
 |
 |
 |
.JPG)
.jpg)
1USD
1EUR
1RUB