Ноҳияи Сангвор яке аз минтақаҳои дорои имкониятҳои васеи рушди сайёҳӣ ба шумор меравад. Иқлими мусоид, табиати зебову нотакрор, ҳайвоноти нодир, набототи гуногун, чашмаҳои шаффоф ва ҳавои тозаи кӯҳсор муҳити ҷолибу фароғатие фароҳам овардаанд, ки барои ташкили осоишгоҳҳои табобатӣ, рушди экотуризми дохилӣ ва байналмилалӣ мусоидат менамояд. Меҳмоннавозӣ ва ҳунармандии мардуми маҳаллӣ низ ҷузъи ҷалбкунанда ва муҳими симои сайёҳии ин минтақа маҳсуб мешавад.

   Дар ҳудуди ноҳия мазори таърихии Ҳазрати Бурхи Валӣ, ки таърихи беш аз 3–5 ҳазорсола дорад, манзараи зебои Ҳавзи Кабуд, 36 зиёратгоҳ, даҳҳо мавзеъҳои таърихию фарҳангӣ ва зиёда аз 100 чашмаи шифобахшу ташнашикан ҷойгиранд, ки ноҳияи Сангворро ба як минтақаи шинохташуда на танҳо дар сатҳи ҷумҳурӣ табдил додаанд.

Инфрасохтори сайёҳӣ ва хизматрасонӣ

      Дар масири шоҳроҳи Лабиҷар–Тавилдара–Миёнаду ва дигар мавзеъҳои сайёҳӣ беш аз 60 нуқтаҳои истироҳатӣ, меҳмонхонаҳои сарироҳӣ, пайкараву амсилаҳои ҳайвоноти нодир, марказҳои савдо, нуқтаҳои таъмири нақлиёт, меҳмонхонаҳо ва бунгоҳҳои тиббӣ сохта шудаанд. Дар маркази ноҳия 5 меҳмонхонаи муосир мавҷуд аст, ки имкони қабули ҳамзамон то 60 нафар меҳмонро доранд.

    Дар маҷмӯъ, дар ҳудуди ноҳия 7 меҳмонхонаи миёна, зиёда аз 20 меҳмонхонаи сарироҳӣ, 1 беморхонаи марказӣ, 2 беморхонаи минтақавӣ, 4 маркази саломатии деҳот, 22 бунгоҳи тиббӣ, маркази эмтаъминкунӣ ва бахшҳои алоҳидаи мубориза бо бемориҳои сил ва ҳифзи саломатии кӯдакон фаъолият менамоянд.

    Ҳамчунин бояд гуфт, ки дар ноҳия 16 муассисаи фарҳангӣ, 7 китобхона, 1 театри халқӣ, 2 клуби деҳот, 2 хонаи фарҳангӣ, боғи фарҳангӣ, майдони Парчами миллӣ ва Нишон, муҷассамаи Исмоили Сомонӣ, кохи фарҳанг ва меҳмонхонаҳои расмӣ фаъолият доранд. Ғайр аз ин, беш аз 30 маркази садо, 9 дорухона, 11 нуқтаи таъмири нақлиёт, ва 10 нуқтаи фурӯши сӯзишворӣ ба сокинон ва меҳмонон хизмат мерасонанд.

Имкониятҳо…

      Дар қаламрави ноҳия ҳайвоноти ваҳшӣ, аз ҷумла хирс, гург, хуки ёбоӣ, силовсин, рӯбоҳ, нахчир ва дигар намудҳои нодир зиндагӣ доранд. Бо мақсади рушди хоҷагии шикор ва ҳифзи табиат ба ҶДММ «Помир Пикс» 17 126 гектар замин ҷудо гардидааст, ки дар он сайёҳон ҳамасола ба шикори қонунии бузи кӯҳӣ машғул мешаванд. Дар баробари ин, ширкати махсуси сайёҳӣ бо номи «Шикори Шарқ» таъсис ёфтааст.

Себу нок, туту гелос – ганҷури  меваҳо

     Дар ноҳия қариб тамоми намудҳои дарахтони мевадиҳанда ва ороишӣ, аз ҷумла себ, нок, олуча, чормағз, зардолу, тут, гелос, ангур, бодом мерӯянд. Табиат ва иқлими Сангвор барои занбӯриасалпарварӣ, чорводорӣ, боғдорӣ, картошкапарварӣ ва кӯҳнавардӣ шароити хеле мусоид фароҳам овардааст.

Таърих, фарҳанг ва сайёҳӣ дар маркази таваљљуњ

     Барномаи рушди иҷтимоию иқтисодии ноҳияи Сангвор барои солҳои 2021–2025, ки дар он самтҳои таърихию фарҳангӣ, рушди сайёҳӣ, захираҳои табиию гидроэнергетикӣ ва вазъи демографӣ фаро гирифта шудаанд, таҳия гардида, дар маҷмӯъ 174 лоиҳа бо маблағи умумии 147 миллиону 589 ҳазор сомонӣ дар назар дошта шудааст. Ин барнома дар асоси таҳлили амиқи вазъи воқеии ноҳия аз ҷониби гурӯҳи корӣ таҳия шуда, дар иҷлосияи панҷуми Маҷлиси вакилони халқи ноҳияи Сангвор, даъвати шашум аз 14 октябри соли 2020, №65, расман тасдиқ гардидааст.

     Сангвор — як гӯшаи биҳиштосои Тоҷикистон, дар оғӯши кӯҳистони баланд қарор дошта, дар домани худ ҳазорҳо нозу неъмат, сарватҳои табиӣ ва фарҳангиро нигоҳ медорад. Табиат, обу ҳаво, мардум, ҳунар ва меҳмоннавозии сокинон дар якҷоягӣ симои ҷаззобу дилрабоеро фароҳам овардаанд, ки ҳар меҳмонро ба дунёи орому илҳомбахш даъват мекунад.

     Ин ҳама пешрафт ва ободии рӯзафзун — самараи сиёсати хирадмандонаи Пешвои муаззами миллат, муҳтарам Эмомалӣ Раҳмон аст, ки дар заминаи сулҳу субот, ваҳдату якдилӣ ва ташаббусҳои созанда ба даст омадааст. Имрӯз ноҳияи Сангвор, ки замоне минтақаи дурдасти кӯҳистонӣ маҳсуб мешуд, бо ташаккули инфрасохтори муосир, рӯҳияи бунёдкорӣ ва зебоии табиӣ ба як шаҳраки зинда ва умедбахш дар дили кӯҳҳо табдил ёфтааст - маконе, ки ҳар сонияи будан дар он як саёҳати рӯҳонӣ ва таҷрибаи нотакрор аст.

Шодӣ Раҳмонов, мудири бахши иҷтимоӣ вар обита бо ҷомеа.