14-уми ноябр дар толори Қасри фарҳанги ноҳияи Сангвор бо иштироки роҳбарони ташкилоту муассисаҳо, раисони ҷамоатҳо, намояндагони мақомоти иҷроияи ҳокимияти давлатии ноҳия ва сокинони сершумор чорабинии тантанавӣ бахшида ба Рӯзи Президент баргузор гардид.

Дар оғози чорабинӣ раиси ноҳияи Сангвор, Давлатзода Маҳмадшоҳ Ғайрат суханронӣ намуда, ҳозиринро ба муносибати Рӯзи Президент муборакбод кард. Зимни баромад ӯ аз корнамоиву ташаббусҳои созандаи Президенти кишвар ёдовар шуда, нақши шахсияти Роҳбари давлатро дар таҳкими сулҳу суббот ва рушди бемайлони мамлакат баланду бесобиқа ва муҳим арзёбӣ кард.

Раиси ноҳия таъкид намуд, ки Президенти Ҷумҳурии Тоҷикистон муҳтарам Эмомалӣ Раҳмон дар наҷот додани миллат аз вартаи нобудӣ ва баргардонидани оромиву амният ба ҷомеа нақши бориз гузоштааст, ки воқеан ин қаҳрамонии бемислу беназир аст.

 Мавсуф иброз дошт, ки имрӯз тамоми дастовардҳои кишвар,  аз ободонии шаҳру деҳот то рушди маорифу тандурустӣ  маҳз самараи сиёсати хирадмандона ва заҳматҳои пайгиронаи Асосгузори сулҳу ваҳдати миллӣ Пешвои миллат Президенти Ҷумҳурии Тоҷикистон муҳтарам Эмомалӣ Раҳмон  мебошанд.

Дар идомаи чорабинӣ барномаи рангини фарҳангии омодакардаи аҳли фарҳангу ҳунари ноҳия пешкаши мардум гардонида шуд. Рақсу сурудҳои идона, саҳнаҳои мавзӯӣ ва намоишҳои ҳунарӣ ба тантана шукӯҳу таровати хос бахшиданд.

Чорабинӣ дар фазои идона, эҳтиром ба дастовардҳои миллӣ ва арҷгузорӣ ба талошҳои давлату Роҳбари кишвар ба поён расид.

Н. Алиева