Дар фазои маънавӣ ва фарҳангии миллати тоҷик, ки арҷгузорӣ ба инсонҳои хизматгузор аз суннатҳои дерин аст, саҳми роҳбаре, ки барои ормони давлатдорӣ, сулҳ, ҳамдигарфаҳмӣ ва созандагӣ корномаҳои бемислу беназир  дорад, ҳамчун нигине дар тоҷи миллат қадр мешаванд.

Ин ибора рамзи эҳтиром, миннатдорӣ ва арҷгузорӣ аз хизмати шахсияте мебошад, ки дар марҳалаҳои гуногуни таърихӣ барои давлат ва ҷомеа ҳисса гузоштааст. Он пос доштани арзишҳои миллӣ, ваҳдат, ормонҳои истиқлол ва равандҳои созандаро таҷассум мекунад.

Рӯзи Президенти Ҷумҳурии Тоҷикистон яке аз санаҳои муҳими миллӣ ба ҳисоб меравад, ки дар он эҳтиром ба арзишҳои давлатӣ, волоияти қонун ва таҳкими пояҳои давлатдорӣ таҷассум меёбад. Ин рӯз ифодаи эҳтироми давлатӣ ва қадршиносӣ аз саъю талошҳои роҳбарияти кишвар дар ҷодаи рушди устувор, таҳкими сулҳу субот ва боло бурдани сатҳи зиндагии мардум мебошад.

Ҷашнвораи Рӯзи Президент ҳамзамон рӯзи сипосгузорӣ аз заҳматҳои пешвоёнаву созандаи давлати навини тоҷикон буда, хизматҳои арзандаи Асосгузори сулҳу ваҳдати миллӣ  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар барқарорсозии суботи сиёсӣ, рушди иқтисодӣ, муаррифии шоистаи Тоҷикистон дар арсаи ҷаҳонӣ ва таҳкими ваҳдати миллӣ қадрдонӣ мегардад.

Ин сана моро ба ваҳдат, масъулиятшиносӣ, меҳанпарастӣ ва пос доштани дастовардҳои давлати соҳибистиқлол ҳидоят мекунад.

Дар рўзњои сахттарини миллати тоҷик давлат роҳбареро мехост, ки нури ақлро бо гармию нармии дил ҳамроҳ созад, роҳи душворро ҳамвор намояд ва бо сухани устувор мардумро ба сӯи субботу оромӣ ҳидоят кунад.

Муҳтарам Эмомалӣ Раҳмон дар масири давлатсозии навини тоҷикон ҳамчун чеҳраи масъулият, матонат ва собитқадамӣ зуҳур намуданд. Дар давраи пурпечутоб, ки ниёз ба иродаи қавӣ буд, қадамҳои устувори эшон ба мардум эътимод бахшид. Чун  чароғе дар шаби сарду торику тӯлонӣ роҳнамо гашта ва ҳамчун рамзи муттаҳидсозанандаи миллат пазируфта шуданд.

Ин аст ки номи роҳбари хидматгузорро ба нигине дар тоҷи миллат ташбеҳ додем. Ин монандсозӣ на аз зебу зинати калимаҳост, аз шинохти заҳмат, аз шукронаи рӯзгори ороми мо сарчашма мегирад.

Президенти мо, бо ҷоннисориву масъулияти баланди давлатдорӣ, дар давраҳое ки кишвар ба ваҳдату оромӣ ниёз дошт, роҳеро интихоб кард, ки ба созандагӣ, бунёдкорӣ ва муттаҳидсозии миллат равона буд. Бо талош ва иқдоми пайвастааш барои мардум фазои пур аз ваҳдат, имкониятҳои таҳсилу кор ва шароити мусоиди зиндагӣ ба вуҷуд омад, то ҳар сокини кишвар тавонад ормонҳои худро амалӣ созад.

Эшон тавассути сиёсати таҳкимбахши сулҳу ваҳдат, таваҷҷуҳ ба рушду пешрафти иҷтимоӣ ва иқтисодӣ, ва дастгирии фарҳангу давлатдорӣ кӯшиданд, то дар дилу зеҳни мардум рӯҳияи эътимод, умед ва эҳсоси такя ба ояндаи равшанро бедор намоянд.

Имрӯз миллат дар фазои оромӣ, озодӣ нафас мекашад, меомӯзад ва месозад. Ин ҳама шароит барои он фароҳам гардид, ки роҳбари давлат ба қудрати созандагии мардум, ба нерӯи ваҳдат ва ба арзишҳои миллӣ такя кард, то ҳар фарзанди тоҷик битавонад бо сари баланд зиндагӣ кунад, бо нерӯи созанда кор кунад, ва дар ин сарзамини биҳиштосо роҳи ояндаи дурахшонро идома диҳад.

Дар дили кӯҳҳои сарбафалак роҳҳое бунёд гардиданд, ки танҳо қуллаҳоро ба ҳам пайвастан набуданд,  онҳо дилҳоро наздик карданд, мардумро муттаҳид сохтанд ва Тоҷикистони азизро чун як ҷисми воҳид ба ҳам оварданд. Ҳар як нақби кушода, ҳар пули нав, ҳар роҳе, ки байни дараву доман густурда шуд, рамзи иродаи созанда ва қудрати иттиҳод гардид.

Дар оғӯши ҳамин кӯҳсорон шаҳракҳои нав комат афрохтанд, шаҳракҳое, ки мислашро мардум дар тӯли садсолаҳо надида буданд. Ин маҳаллаҳои  муосир ба орзуҳои дерини ҷомеа ҷавоб гуфтанд. Мактабҳои нав, кӯдакистонҳо, роҳҳо, боғҳо ва хонаҳои муосир бо хандаи кӯдакон зиндагиро зебу зиннат бахшиданд.

Роҳҳо аз Тоҷикистон ба чор гӯшаи дунё кушода шуданд. Ин роҳҳо  на  хати замин,  онҳо хати тақдири ҷавонон буданд, ки љавононро ба донишгоҳҳо, марказҳои илмӣ  бурданд.

Ҳамин тариқ, дар миёни мардум унвони Пешво миллат ҳамчун изҳори эҳтиром ва қадршиносӣ нисбат ба нақши созанда, заҳматҳои пайваста ва талошҳои фарзанди фарзонаи миллат дар роҳи сулҳу оромӣ, ваҳдат, рушд ва давлатсозӣ пайдо шудааст.

Рӯзи Президент ба ҳама тоҷику тоҷикистонӣ муборак!

Бафозода Садорат,

муовини раиси ноҳияи Сангвор