Муҳтарам даъватшавандагон!

   Ҳар сол дар саросари ҷумҳурии азизамон рӯзи 1-уми октябр даъвати тирамоҳии шаҳрвандон ба сафи Қувваҳои Мусаллаҳи Ҷумҳурии Тоҷикистон оғоз  мегардад.

   Дар моддаи 43-и Конститутсияи Ҷумҳурии Тоҷикистон қайд шудааст, ки ҳифзи Ватан, ҳимояи манфиати давлат, таҳкими истиқлолият, амният ва иқтидори мудофиавии он вазифаи муқаддаси шаҳрванд аст.

   Ҳифзи Ватан ба хотири эҳтироми, меҳнату фаъолияти наслҳои гузашта, фарҳанги аҷдодӣ ва мероси таърихӣ, ҳимояи манфиати давлат, таҳкими истиқлолият, амният ва иқтидори мудофиавии он зарур аст. Манфиат, истиқлолият, амният ва иқтидори мудофиавии давлат бо Ватан, ватандорӣ ва ватаншиносӣ алоқаманданд.              

  Азбаски таҳкими амнияти давлат вазифаи ҳар як шаҳрванд аст, шаҳрвандон вазифадоранд, ки дар қатори давлат, ташкилотҳои ҷамъиятӣ ва дигар муассисаву идораҳо дар таъмини амнияти Ватан саҳми худро гузоранд.   Шаҳрвандон ҳамчунин дар ҳифзи сарҳади давлатӣ, ошкор намудани ҷиноятҳои террористӣ, пешгирии маводи мухаддир ва ҷиноятҳои коррупсионӣ иштирок мекунанд.

  Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳама баромадҳои худ ба ҷавонон ва халқи Тоҷикистон таъқид намуда мегӯяд: ”Дӯст бошед! Тифоқ бошед! Ватани худ-Тоҷикистони азизро дӯст доред!”

  Аз ноҳияи Сангвор  ҳамасола 30-35 нафар ҷавонон ихтиёрӣ ба комиссариати ҳарбии ноҳия ҳозир шуда барои хизмат ба сафи Қувваҳои Мусаллаҳи Ҷумҳурии Тоҷикистон сафарбар карда мешаванд.Чанд  сол аст, ки нақшаи  даъват дар рӯзи якуми даъват иҷро мегардад. Айни замон дар сафи Қувваҳои Мусаллаҳи Ҷумҳурии Тоҷикистон аз ноҳияи Сангвор зиёда аз 100 нафар ҷавонон содиқона хизмат намуда истодаанд. Ба даъвати тирамоҳии ҳозира зиёда аз 30 нафар ҷавонон ихтиёрӣ ҳозир шуда, имрӯз дар баробарӣ дигар ҷавонони кишвар омодаи хизмат дар сафи Қувваҳои Мусаллаҳи Ҷумҳурии Тоҷикистон мебошанд. Тибқи Қонуни Ҷумҳурии Тоҷикистон «Дар бораи уҳдадории умумии ҳарбӣ ва хизмати ҳарбӣ» хизмати ҳарбӣ навъи махсус ва афзалиятноки хизмати давлатӣ буда, иҷрои бевоситаи уҳдадории конститутсионии шаҳрвандони Ҷумҳурии Тоҷикистонро дар ҳайати Қувваҳои Мусаллаҳ, дигар қушунҳо ва сохторҳои ҳарбӣ дар бар мегирад.

      Артише, ки ҳайати он дар руҳияи баланди ватандӯстӣ тарбия ёфта, дорои низоми қавӣ аст, такягоҳи боэътимоди давлат ва миллат мебошад. Ҳушёриву зиракии сиёсӣ шарти муҳимтарини мустаҳкамии артиши миллист.

      Манфиати давлат аз манфиати ҷомеа ва халқ сарчашма мегирад. Аз ин хотир, ҳимояи манфиатҳои миллии давлат аз ҷумлаи вазифаҳои муқаддаси ҳар шаҳрванди Тоҷикистон мебошад.

      Барои ҳамин, таҳкими истиқлолияти давлатӣ вазифаи муқаддаси ҳар шаҳрванди Тоҷикистон мебошад. Зиндагии осоиштаи мардум маҳз натиҷаи заҳмати содиқонаи ҳайати шахсии Қувваҳои Мусаллаҳ ва мақомоти ҳифзи ҳуқуқ мебошад.

        Волотарин меъёри ватандорию ватандӯстӣ расидан ба қадри Ватан, миллат ва давлати соҳибистиқлол, ба ҷо овардани хизмати Ватан ва ҳифзи марзу буми он аст.

              Муҳтарам даъватшавандагон!

Бо боварӣ гуфта метавонам, ки Шумо бо ҷасорат ва мардонагии хеш дар таҳкими сулҳу суботи саросарии Тоҷикистони азиз саҳми арзанда мегузоред.

         Бо чунин орзуҳои нек ҳамаи Шуморо, ки ихтиёран дар сафи Қувваҳои Мусаллаҳи Ҷумҳурии Тоҷикистон хизмат карданро мақсади худ қарор додаед, самимона табрик намуда, ба Шумо сиҳатмандӣ, хонаободӣ, сарбаландӣ ва дар хизмати аскариатон далерию шуҷоатмандӣ хоҳонам.

Саломату сарбаланд бошед!