Филиали №21 “Амонатбонк” дар ноҳияи Сангвор яке аз марказҳои муҳими хизматрасонии  бонкӣ барои аҳолӣ ва соҳибкорон мебошад. Ин филиал хизматҳои гуногуни молиявӣ ва бонкиро ба мизоҷон пешниҳод менамояд.

Инчунин  бо кормандони соҳибтаҷриба  кӯшиш мекунад, ки ба муштариён тамоми хизматрасониҳои бонкӣ ва молиявиро бо сифати баланд ва зуд дастрас намоянд. Ҳамчунин, филиал ба талаботи замони муосир, аз ҷумла истифодаи технологияҳои электронӣ ва хизматрасониҳои онлайнӣ, диққати махсус медиҳад.

 Дар пайи хизматҳои босифат ва аҳамияти молиявии филиали №21 КВД ҶТ “Амонатбонк” дар ноҳияи Сангвор мо тасмим гирифтем, ки бо мудири филиал,  Раҷабов Бахтовар Саидумронович, як суҳбати махсус анҷом диҳем. Ҳадафи ин суҳбат пеш аз ҳама барои он аст, ки хонандагони нашрия бо фаъолияти филиал, хизматрасониҳои он ва имкониятҳои молиявӣ барои аҳолӣ ва соҳибкорон ошно шаванд.

 Мо умедворем, ки ин сӯҳбат барои хонандагон муфид хоҳад буд ва имконият фароҳам меорад, ки онҳо бо фаъолияти филиал ва аҳамияти он дар рушду ободии ноҳия бештар маълумот пайдо намоянд.

 Аз фаъолияти филиали “Амонатбонк№21” бигӯед. Ҳадафу вазифаҳои асосии филиал чист?

 -Филиали №21 КВД ҶТ “Амонатбонк” дар ноҳияи Сангвор мақсаду вазифаҳояш ин пеш бурдани сиёсати иҷтимоию пулии давлат ба ҳисоб рафта, таъмини аҳолӣ бо пули нақдӣ, пардохти музди маош, нафақаю кӯмакпулиҳои давлатӣ ва дигар намуди хизматрасониҳои бонкӣ ба ҳисоб меравад.

 -Кадом намудҳои пасандоз ва хизматрасониҳои молиявӣ ба сокинон пешниҳод мешавад?

-Бонк 8 намуди пасандоз ба аҳолӣ пешниҳод намудааст, ки  аз 3 моҳ то 3 сол пасандози кӯдакона то ба синни 16 солагӣ расидани фарзанд қабул карда шуда,меъёри фоизҳои ба аҳолӣ пардохтшаванда аз 6 фоиз то 13 фоиз бо пули миллӣ ва аз 2 фоиз то 6 фоиз бо доллари ИМА пардохт карда мешавад, ки ин ҳам бошад баҳри баланд бурдани даромаднокии аҳолӣ равона карда шудааст. Пасандози нафақавӣ ба муҳлати 1 сол қабул карда шуда,  аз 2 фоиз то 11 фоиз даромади фоизӣ пардохт карда мешавад.

 -Оё  хизматрасониҳо барои сокинони деҳот низ дастрас ҳастанд ва чӣ гӯна?

-Дар ноҳияи Сангвор 5 ҷамоат ба қайд гирифта шудааст, ки  ҷамоати Чилдара аз ҷониби МХБ 21/665, ки 2 нафар фаъолият мекунанд,  барои аҳолӣ  хизматрасонии бонкӣ ба пуррагӣ расонида мешавад. Ҷамоати Тавилдара ва ҷамоати Вахиё аз ҳисоби филиали бонк хизматрасонии бонкӣ расонида шуда, ба ҷамоатҳои Заршӯён ва Ваҳдат аз ҳисоби МХБ 21/174, ки 2 нафар корманд фаъолият мекунанд, хизматрасонии бонкӣ  барои мардум ба пуррагӣ расонида мешавад.

 -Оё филиал хизматрасонии интернетӣ ва мобилии бонкӣ пешниҳод мекунад?

 - Бале, филиали №21 КВД ҶТ “Амонатбонк” дар ноҳияи Сангвор хизматрасонии интернетӣ ва мобилии бонкӣ  пурра ба роҳ монда шуда, ташкилотҳои буҷети 103 адад мебошад, ки комилан дастрасӣ  ба интернетбонкинг кушодааст. Ин  ба корхонаҳо имкон медиҳад, бе ташриф ба филиал, тариқӣ фосилавӣ музди маошро ба кортҳои кормандонашон гузаронанд. 60 адад корхонаҳои  ғайрибуҷетӣ низ бо ин намуди хизматрасонӣ пайваст шудаанд, ки онҳо низ имконияти  пардохти андоз, музди маош ва дигар пардохтҳо ба таври фосилавӣ бе ташриф ба бонк гузаронида мешавад. Филиал бо 6126-дона кортҳои бонкӣ хизматрасонӣ менамояд, ки бо барномаи амонатмобайл пайваст карда шуда, ба мизоҷон имкони пардохти беш аз 900 намуди  хизматрасониҳои  давлатӣ ва дигар пардохтҳо фароҳам оварда шудааст.

 -Барои беҳтар кардани хизматрасонӣ ба мизоҷон кадом заминаҳоро фароҳам овардаед?

 -Барои бехтар намудани хизматрасонӣ баҳри  мизоҷони филиал ҳамаи кӯшишҳоро ба роҳ монда, баҳри сари вақт пардохти маблағи мизоҷон 2 адад банкомат, 5 дона ПОСТ терминалҳо барои пардохти  пули нақдӣ истифода бурда шуда, ҳамаи кормандон барои сари вақт қонеъ гардонидани дархости мизоҷон равона карда шудаанд.

 -Барои ҷалби мизоҷони нав ва васеъ кардани  хизматрасонӣ нақша доред?

 -Нақшаҳои мо рӯз ба рӯз  дар амал татбиқ мешаванд. Барои ҷалби мизоҷони нав ва васеъ кардани хизматрасониҳои бонкӣ аз ҷониби кормандон дар байни ахолӣ аксия ва фаҳмондадиҳӣ пайваста гузаронида мешавад, ки  рӯз то рӯз мизоҷон зиёд гардида, платформаи хизматрасонии бонк баҳри хизматрасониҳои қуллай ва осон ба мизоҷон равона шудааст.

-Кадом намуди қарзҳоро барои сокинон ва соҳибкорон  пешниҳод мекунед?

-Филиали №21 КВД ҶТ “Амонатбонк” дар ноҳияи Сангвор 12 номгӯи қарз барои аҳолӣ пешниҳод мекунад, ки ба соҳаи кишоварзӣ, чорводорӣ, замбӯрпарварӣ, истеъмолӣ, соҳибкорони инфиродӣ, ҳунарҳои мардумӣ ва овердрафт равона шудааст.

-Меъёру шартҳои асосии  гирифтани қарз чӣ гуна аст? Мисол фоиз муҳлати пардохт ва ғ...

-Тибқи низомномаи қарзии филиали №21 КВД ҶТ “Амонатбонк”  ҳамаи шаҳрвандони Ҷумҳурии Тоҷикистон, ки синнашон ба 18 расидааст, ҳуқуқи гирифтани қарзро доранд, агар манбаи  даромад дошта бошанд ё ин, ки бо кишоварзӣ машғул бошанд.  Меъёрҳои фоиз дар филиал аз 18 фоиз  то 22 фоиз солона пешниҳод карда мешавад, ки  муҳлати қарзҳо аз 1 то се солро дар бар мегирад.

 -Оё барои мардуми деҳоти дурдаст имтиёзҳои қарзгирӣ мавҷуд аст?

- Филиал ба ҳамаи сокинони ноҳияи Сангвор баҳри додани қарз корбарӣ менамояд. Ҳатто дархост барои гирифтани қарзро тариқи Телеграмм, чат-бот ба роҳ монда, ки мизоҷон метавонанд аз хонаи худ истода дархост барои гирифтани қарз  пешниҳод кунанд. Асосан қарзҳои филиал ба ҳамаи намуди соҳаи кишоварзӣ бо 19 фоиз солона равона карда шудааст, ба кормандони давлатӣ ва мақомоти ҳифзи ҳуқуқ, соҳаи тиб ва маориф бо 18 фоиз солона ва соҳибкорон 22 фоиз солона то 3 сол пешниҳод карда мешавад.

 -Оё сокинони Сангвор фаъолона аз хизматҳои ѓайринақдӣ истифода мекунанд?

-Тибқи Фармони Президенти Ҷумҳурии Тоҷикистон муҳтарам Эмомалӣ Раҳмон аз 22 июни соли 2023 таҳти рақами 586 “Дар бораи тадбирҳои вусъат додании ҳисоббаробаркунии  ғайринақдӣ” ҳамаи пардохтҳои давлатӣ ва ба он баробар ҷаримаҳо ва пардохтҳои коммуналӣ ба пуррагӣ дар ноҳия тариқи ғайринақдӣ ба роҳ монда шуда, аз ҷониби  филиал 23 адад ПОСТ терминалҳо ва 10 адад  QҚ-рамзҳо дар идораҳои давлатӣ гузошта шуда, ба аҳолӣ ҳамарӯза хизматрасонӣ намуда истодаанд. Иловатан 11 адад ПОСТ терминал ва 14 адад QҚ-рамзҳо дар марказҳои савдо, дорухонаҳо пайваст карда шуда, баҳри харидорӣ намудани мизоҷони аз марказҳои савдо ва дорухонаҳо  бе истифодаи пули нақд равона карда шудааст.

-Кадом барномаи бонкӣ барои гузаронидани амалиётҳои ғайринақдӣ дастрас аст?

 -Барои гузаронидани амалиётҳои ғайринақдӣ барномаҳои интернетбонкинг ва амонатмобайл роҳандозӣ карда шудааст.

-Хизматрасонии интиқоли маблағ ва пардохтҳои коммуналиро мардум ба тариқи ғайринақдӣ пешниҳод мекунанд?

-Филиал хизматрасонии интиқоли маблағҳоро ба таври зарурӣ ба роҳ монда, интиқол аз хориҷи кишвар бо системаҳои “Юнистри”, “Вестерн-юнион” ва “Астрасенд” ба роҳ монда, тариқи кортҳои бонкӣ аз кишвари Рооссия низ роҳандозӣ шудааст. Дар дохили кишвар маблағ тариқи низоми “Дастрас” ба роҳ монда шуда, аз барномаи Амонатмобайл низ интиқоли дастрас ва байни кортҳои миллӣ “кошелёк”-ҳо роҳандозӣ гардидааст.

 -Сипос, ба Шумо барори кор таманно мекунем!

 -Саломат бошед!

 Суҳбаторо: Наҳтутӣ Алиева