Кишоварзӣ дар ноҳияи Сангвор яке аз шуғлҳои асосии сокинон маҳсуб ёфта, дар таъмини амнияти озуқаворӣ ва рушди иқтисоди маҳаллӣ саҳми арзанда дорад. Мардум бо истифода аз имкониятҳои табиӣ ва иқлимии минтақа ба парвариши зироатҳои ғизоӣ, полезӣ ва чорводорӣ машғуланд.

     Аз ҷумла, картошкапарварӣ дар ноҳия мавқеи муҳим дорад. Ҳоҷагиҳои деҳқонӣ дар фасли баҳор ва аввали тобистон корҳои саҳроиро бо маром ба роҳ монда, дар мавзеъҳои мувофиқ кишти картошкаро ба анҷом мерасонанд. Бо мақсади баланд бардоштани ҳосилнокӣ, деҳқонон аз усулҳои муосири агротехникӣ истифода мебаранд.

    Айни ҳол, корҳои парвариш ва нигоҳубини зироатҳо ҷараён дошта, кишоварзон аз мусоид омадани ҳаво истифода бурда, ба захирасозии об, мубориза бо ҳашароти зараррасон ва риояи муқаррароти агротехникӣ диққати ҷиддӣ медиҳанд.

     Тибқи иттилоъи сардори шуъбаи кишоварзии ноњияи Сангвор М. Ќаландаров, дар ноҳия ва мувофиќи дастури Сарвазири Ҷумҳурии Тоҷикистон аз 12 октябри соли 2024, ки майдони кишти асосии картошкаро барои соли 2025 дар ҳаҷми 800 гектар муайян кардааст, омодагии ҳамаҷониба барои иҷрои ин нақша доранд. Ин майдон аз ҳисоби тамоми шаклҳои хоҷагидорӣ, аз ҷумла хоҷагиҳои деҳқонӣ, хоҷагиҳои калон ва хурд, ҷамоату деҳот ва соҳибкорон таъмин карда мешавад.

     Мақсади асосии ин тадбирҳо афзун намудани истеҳсоли картошка дар ноҳияи Сангвор ва таъмин намудани аҳолии ноҳия ва вилоят бо маҳсулоти босифати ғизоӣ мебошад. Ҳамчунин, ин дурнамо саҳми муҳим дар таъмини амнияти озуқавории ноҳия ва рушди иқтисоди маҳаллӣ хоҳад дошт.

     Шуъбаи кишоварзии ноҳия бо кӯмаки мутахассисон ва ҷалби сокинон барои татбиқи ин нақша чораҳои амалӣ андешида, ба таъмини агротехника, дастрасии маҳсулоти тухмии босифат ва машваратҳои техникии замонавӣ диққати ҷиддӣ медиҳанд.

      Бо таваҷҷуҳ ба дастуру супоришҳои Президенти мамлакат ва Сарвазир, дар соли 2025 кишти картошка дар майдони 800 гектар дар ноҳияи Сангвор амалӣ карда шуда, боиси рушди соҳаи кишоварзӣ ва таъмини пешрафти иқтисоди маҳаллӣ хоҳад гашт.

       Аз ҷониби Вазорати кишоварзӣ ва корхонаҳои ёрирасон барои кишти картошка дар соли 2025 дар ноҳияи Сангвор 48 тонна тухми картошка ворид карда шудааст. Ин тухмӣ тибқи тартиби муайян ба хоҷагиҳои деҳқонии ҳудуди ноҳия тақсимоти саривақтӣ ва дуруст шудааст.

      Дар ин робита, амри Раиси ноҳияи Сангвор аз 11 апрели соли равон тасдиқ гардида, ситоди ноҳиявӣ оид ба омодагӣ ва нақшаи тадбирҳои саривақтии кишти картошка дар хоҷагиҳои ноҳия барои соли 2025 ташкил карда шудааст. Ҳадафи асосии ситод назорат ва ҳамоҳангсозии ҳама чорабиниҳои зарурӣ барои таъмини иҷрои босамари нақшаи кишт мебошад.

       Мутобиқ ба нақшаҳо ва супоришҳои роҳбарияти ноҳия, ситод ҷаласаву машваратҳои доимӣ мегузаронад ва бо ҳамаи шаклҳои хоҷагидорӣ ҳамкории наздикро ба роҳ мемонад, то кишти картошка дар муҳлати муайяншуда бо сифати баланд ва самаранок анҷом дода шавад.

      Ҳамкории ҳамаҷониба ва дастгирии мақомоти иҷроияи маҳаллии ҳокимияти давлатӣ, вазорат ва сохторҳои марбута барои амалӣ гардонидани ин нақша муҳим мебошад.

     Бо ин роҳ, мо метавонем саҳми арзандаи худро дар таъмини амнияти озуқаворӣ ва рушди иқтисоди ноҳияи Сангвор ва минтақаи васеътар гузорем.

      Дар идома М. Ќаландаров тазаккур дод, ки ситоди ноҳиявӣ, аз ҷониби роҳбарони ташкилотҳо, муассисаҳо ва раисони ҷамоатҳои деҳот оид ба рафти кишти картошка таъсис ёфтааст, ҳар рӯз ба ситоди ноҳиявӣ ҳисоботи муфассал ирсол менамояд. Ин чорабинӣ имкон медиҳад, ки раванди кишти картошка бо назорати қатъӣ ва самаранокии баланд амалӣ гардад.

      Тибқи дурнамои сохтори кишоварзии соли ҷорӣ, дар ноҳияи Сангвор майдони умумии заминҳои кишт 1247 гектар нақшабандӣ шудааст, ки аз ин 996 гектар замини обӣ ва 251 гектар замини лалмӣ мебошад. Аз ин майдон, 800 гектар барои кишти картошка дар нақшаи дурнамо пешбинӣ гардидааст.

     Имрӯз бошад, ноҳия бо пуррагӣ майдони 800 гектар заминро ба кишти картошка алоқаманд карда, ба 100% иҷрои нақшаи дурнамои кишти картошка ноил гаштааст. Ин нишондиҳандаҳои мусбат, ки дар пайи кору талошҳои мақомот ва кишоварзон ба даст омадааст, нишонаи ҷиддияти ноҳия дар таъмини амнияти озуқаворӣ ва рушди соҳаи кишоварзӣ мебошад.

    Ташаккул ёфтани амнияти озуқаворӣ мустақиман ба рушди умумии истеҳсолоти кишоварзӣ мусоидат намуда, барои пешрафти иқтисоди ноҳия ва таъмини истиқлолияти ғизоӣ нақши калидӣ мебозад.

      Бо чунин дастовардҳо ва ҳамкории ҳамаҷониба, ноҳия ба сӯи рушди устувор ва таъмин намудани аҳолӣ бо маҳсулоти кишоварзӣ қадамҳои устувор мегузорад. Ҳукумати маҳаллӣ низ ҷиҳати дастгирии хоҷагиҳои деҳқонӣ ва фароҳам овардани шароити мусоид барои фаъолияти онҳо тадбирҳои зарурӣ меандешад. Њадаф, таъмини бозори дохилӣ бо маҳсулоти тару тоза ва баланд бардоштани сатҳи некуаҳволии мардум мебошад.

Н. Алиева